Gen. Peter Cirimwami na Col. Rugabisha bashyinguwe mu cyubahiro i Kinshasa, bahabwa impeta z’ubutwari nyuma yo kugwa ku rugamba

I Kinshasa, kuri uyu wa mbere, habaye umuhango ukomeye wo gusezera bwa nyuma kuri Jenerali-Majoro Peter Cirimwami Nkuba na Colonel Rugabisha Alexis, abasirikare bakuru ba FARDC baguye ku rugamba barwana n’inyeshyamba za M23 mu burasirazuba bwa Repubulika Iharanira Demokarasi ya Congo.

Umuhango wabereye mu nteko ishingamategeko ya DR Congo, witabiriwe na Perezida Félix Tshisekedi, Minisitiri w’Ingabo, abayobozi bakuru b’ingabo na bamwe mu miryango y’abitabye Imana. Isanduku ya buri musirikare yari irimo ifoto yabo, ndetse umwe kuri umwe bakomejwe kwibukwa nk’“intwari zaharaniye igihugu kugeza ku ndunduro.”

Urupfu rutavuzweho rumwe

Gen. Peter Cirimwami yishwe ku wa 24 Mutarama 2025, ubwo yari mu ruzinduko ku rugamba i Sake hafi ya Goma, aho ingabo za leta zari zihanganye bikomeye n’inyeshyamba za M23. Igisirikare cyatangaje ko “yishwe n’umwanzi,” ariko bamwe mu bo mu muryango we bagaragaje impungenge, bavuga ko “yaba yarashwe n’abo bari kumwe.”

Colonel Rugabisha we yaguye ku rugamba i Nyabibwe ku wa 1 Gashyantare 2025, aho yari ayoboye Brigade ya 12 mu mirwano ikaze yahuje FARDC n’inyeshyamba zarimo zimanuka ziva Goma zerekeza Bukavu. Yarashwe amasasu menshi mu gatuza, nyuma y’uko benshi mu basirikare bari kumwe bahunze, agasigarana n’itsinda rito.

Perezida Tshisekedi "Bari intwari, tuzakomeza kububaha"

Perezida Tshisekedi yavuze ko aba bombi bapfuye barwana "nk’uko babayeho", ashimangira ko igihugu kizakomeza urugamba rwo gukurikirana abagize uruhare mu bikorwa by’ubwicanyi n’iterabwoba ku baturage.

Mu magambo ye, yagize ati “Cirimwami yabayeho nk’umusirikare, apfa ari ku isonga ry’inshingano. Rugabisha na we yari mu ngabo z’igihugu zidatsindwa, zihakana gutsindwa.”

Bazamuwe mu ntera, bahabwa icyubahiro cy’igihugu

Mu rwego rwo kubaha icyubahiro gikwiye, aba basirikare bashyizwe mu rwego rw’intwari za DR Congo ruzwi nka "Héros nationaux Kabila-Lumumba". Cirimwami yazamuwe mu ntera ahabwa ipeti rya Lieutenant-général, naho Rugabisha wahoze ari Colonel agirwa Général de brigade.

Bombi bashyinguwe mu irimbi rishya rya gisirikare ryitwa Repos du soldat, riherereye muri Komine N'sele i Kinshasa. Iri rimbi rifite ubuso bwa hegitari 74 rizajya rishyingurwamo abasirikare n’abategetsi bakuru baguye mu butumwa bw’igihugu.