Ubushinwa bwerekanye intwaro zidasanzwe mu karasisi kahuriyemo Putin, Kim na Xi

Mu muhango ukomeye wabereye mu mujyi wa Beijing, Ubushinwa bwerekanye intwaro nshya za gisirikare zitari zizwi mbere, mu karasisi kabaye kuri uyu wa Gatatu, kitabiriwe n’abakuru b’ibihugu barimo Perezida Vladimir Putin w’Uburusiya, Kim Jong Un wa Koreya ya Ruguru, ndetse na Perezida w’Ubushinwa, Xi Jinping ubwe.

Aka karasisi kabereye kuri Tiananmen Square, kahuriranye no kwizihiza imyaka 80 ishize Ubushinwa butsinze Ubuyapani mu ntambara ya kabiri y’isi. Ni ubwa mbere aba bayobozi batatu – Xi, Putin na Kim – bagaragaye bari kumwe imbona nkubone mu ruhame.

Perezida Xi mu ijambo rye yavuze ko "Ubushinwa butazigera butererana umutekano wabwo" kandi ko "nta na rimwe buzatinya intwaro z’ibikangisho by’abandi." Yanongeyeho ko igihugu cye "kidashobora guhagarikwa", asaba abaturage kwibuka igitambo cyatanzwe mu ntambara yabayeho.

Mbere y’uko karasisi ritangira, Xi yaramutse abategetsi baturutse mu bihugu 26 bari baje kwifatanya n’Ubushinwa, nyuma anyura imbere y’ingabo ibihumbi zari zihagaze ku murongo ku muhanda wa Changan Avenue, ziteguye gutambuka mu buryo butunganye.

Intwaro zidasanzwe zagaragajwe

Mu by’ingenzi byaranze uwo munsi harimo kugaragaza intwaro nshya za gisirikare, zirimo:

• Misile kirimbuzi zishobora kuraswa ku yindi migabane (ICBMs)

• Intwaro za 'hypersonic' zifite umuvuduko udasanzwe

• Imashini z’intambara zitwa “Robotic Dogs”

• Imodoka zitwarira za misile zigenda munsi y’amazi

• Drone zifite ubushobozi bwo kurinda ibifaru no kurwanya ibitero bya drone nyinshi icyarimwe

• Intwaro ya laser nshya yiswe LY-1, bivugwa ko ishobora gutwika ibikoresho bya electronike ndetse igahuma n’abapilote b’indege z’intambara.

Umusesenguzi mu bya gisirikare Alexander Neill yavuze ko LY-1 ari intwaro ifite ubushobozi bwo guhungabanya cyane uburyo bw’ikoranabuhanga bw’umwanzi, ari nabyo bituma ibihugu bikomeye bikomeje gukurikiranira hafi iterambere ry’igisirikare cy’Ubushinwa.

‘Guam Killer’ – Intwaro yateye impaka

Ubundi butumwa bukomeye bwatanzwe binyuze mu karasisi ni kugaragaza misile ya Dongfeng (DF)-26D, yahawe izina rya "Guam Killer". Iyi misile bivugwa ko ishobora kurasa ku ntera ndende igatera ibigo bya gisirikare by’Abanyamerika biri ku kirwa cya Guam – agace gafatwa nk’icy’ingenzi mu bikorwa bya gisirikare bya Amerika mu nyanja ya Pasifika.

Abasesenguzi bavuga ko DF-26D ishobora kwihisha ‘radar’ za Amerika, ndetse ikanacika ‘system’ za Patriot zo kurinda izindi misile, bityo bikayihindura imwe mu ntwaro zitera impungenge mu gihe habaho intambara ikomeye.

Trump ntiyitabiriye, ariko yikomye ibibera i Beijing

Mu gihe ibindi bihugu byinshi byari bihagarariwe, uwahoze ari Perezida wa Leta Zunze Ubumwe za Amerika, Donald Trump, ntiyitabiriye uyu muhango. Icyakora yanditse kuri Truth Social, aho yavuze ko Xi, Kim na Putin "barimo kugambana ku mugaragaro ngo bahangane na Amerika."

Isesengura

Akarasisi k’i Beijing karakomeza kwerekana impinduka mu mibanire y’Ubushinwa n’ibihugu bisanzwe bitavuga rumwe na Amerika. Kandi ku rundi ruhande, kwerekana intwaro ziri ku rwego rwo hejuru bishimangira icyerekezo cy’Ubushinwa cyo kuba ku isonga mu by'igisirikare n’ikoranabuhanga.