U Rwanda na Maroc byasinyanye amasezerano y’ubufatanye mu by’Igorora no gucunga amagereza

U Rwanda na Maroc byateye indi ntambwe mu gushimangira umubano usanzwe hagati yabyo, binyuze mu gusinyana amasezerano mashya y’imikoranire mu rwego rw’igorora n’imicungire y’amagereza. Ni amasezerano agamije guteza imbere ubufatanye mu kunoza uburyo bwo gufunga no kugorora, kongerera ubushobozi inzego zombi no gusangira ubunararibonye mu miyoborere y’amagereza n’amagororero.

Aya masezerano yashyizweho umukono n’Umuyobozi Mukuru w’Urwego rushinzwe amagereza muri Maroc, Mohamed Salah Tamek, hamwe na Komiseri Mukuru w’Urwego rw’Igorora mu Rwanda (RCS), CG Murenzi Evariste, mu muhango wabereye i Kigali.

Gusangira ubumenyi n’ubunararibonye

Mu byo impande zombi zemeranyijeho, harimo guteza imbere imikoranire ishingiye ku gusangira ubunararibonye mu micungire y’amagereza, imiyoborere myiza mu magororero, no guteza imbere uburyo bwo gufasha abarangije ibihano gusubira neza mu buzima busanzwe.

Mohamed Salah Tamek yavuze ko aya masezerano ari intambwe ikomeye iganisha ku kunoza serivisi z’igorora no guteza imbere urwego rw’amagereza mu bihugu byombi.

"Tubonye amahirwe yo kwigira ku buryo u Rwanda rucunga neza amagereza yarwo, ndetse n’uko rufasha abarangije ibihano kwinjira neza mu muryango nyarwanda. Turashaka gukomeza ubu bufatanye buhamye bushingiye ku bwubahane n’imiyoborere myiza," yavuze Tamek.

Yakomeje ashimangira ko hari byinshi Maroc ishobora kungukira mu mikorere y’u Rwanda, cyane cyane mu bijyanye n’umutekano w’amagereza, kugenzura imfungwa zifite imyitwarire igoye no kubaka ubushobozi bw’abakozi.

RCS yizeye imikoranire irambye

Ku ruhande rw’u Rwanda, Komiseri Mukuru wa RCS, CG Murenzi Evariste, yashimye uru rwego rushya rw’ubufatanye, ashimangira ko ruzafasha mu kuzamura ireme ry’imikorere y’inzego z’igorora.

"Turashimira Maroc ku bufatanye igaragaza mu nzego zitandukanye. Aya masezerano azadufasha gukomeza kunoza uburyo twita ku bagororwa, tukabafasha gusubira mu buzima busanzwe bafite ubumenyi n’indangagaciro zibafasha kubaho neza mu muryango," yavuze CG Murenzi.

Yongeyeho ko aya masezerano azatuma habaho isaranganya ry’ubumenyi, amahugurwa rusange n’ihugurwa ryihariye, ndetse n’ubufatanye mu by’ikoranabuhanga no guhanahana amakuru hagati y’impande zombi.

CG Murenzi kandi yagaragaje icyizere ko aya masezerano atari iherezo, ahubwo ko azafungura amarembo y’izindi nzira nshya zo kwagura ubufatanye hagati y’u Rwanda na Maroc, mu rwego rwo gukomeza kuzamura ireme ry’imiyoborere muri izo nzego.

Umubano wa kera ushingiye ku bufatanye busesuye

U Rwanda na Maroc ni ibihugu bifitanye umubano ukomeye n’ubufatanye mu nzego zitandukanye. Muri Ukwakira 2016, Umwami Mohammed VI wa Maroc yagiriye uruzinduko rw’akazi mu Rwanda, rwasinyiwemo amasezerano 19 y’ubufatanye arimo ayerekeye ishoramari, ubutwererane n’ubuhahirane hagati y’ibihugu byombi. Muri ayo masezerano, harimo n’uburenganzira bw’abadipolomate bwo gutembera hagati y’ibihugu bitagombye visa.

Muri 2019, ibihugu byombi byongeye gusinyana andi masezerano 12, arimo ay’uburezi, ubuhinzi n’iterambere ry’ubukungu. Maroc kandi iza mu bihugu bya mbere bitanga buruse nyinshi ku Banyafurika biga muri kaminuza zo muri icyo gihugu, Abanyarwanda barimo.

Ubufatanye mu rwego rw’igorora ni indi ntambwe y’ingenzi yerekana ko umubano w’u Rwanda na Maroc ukomeje gushinga imizi, ushingiye ku bwuzuzanye, gusangira ubunararibonye no kwigira hamwe.