Drone y’ingabo z’u Rwanda yahanutse, ikomeretsa abanyeshuri batatu mu Karere ka Rutsiro

Mu gitondo cyo ku wa kabiri, indege nto ya gisirikare itagira umupilote (izwi nka drone) y’ingabo z’u Rwanda (RDF) yakoze impanuka mu Murenge wa Kivumu, Akarere ka Rutsiro mu Burengerazuba bw’u Rwanda, ikomeretsa abanyeshuri batatu bari bavuye ku ishuri bataha.

Itangazo ryashyizwe hanze n’igisirikare cy’u Rwanda rivuga ko iyo drone yari mu myitozo isanzwe, ariko kubera ikirere kitari kimeze neza, yaje guta inzira ikagwa ahari abaturage, ihitana abanyeshuri batatu mu nzira. Impanuka yabaye ahagana saa saba n’iminota 40 z’amanywa (13:40).

Mu banyeshuri bakomeretse, babiri bajyanwe kuvurirwa ku kigo nderabuzima cya Kivumu, mu gihe undi umwe yajyanywe ku bitaro bikuru bya Murunda. Abavunitse bose bavurirwa mu bigo nderabuzima biri muri ako karere ka Rutsiro.

Nubwo RDF itigeze itangaza ubwoko bw’iyo drone cyangwa ibikorwa by’imyitozo byari birimo gukorwa, yemeje ko iri gukorana n’inzego z’ubuyobozi bw’ibanze n’abaganga kugira ngo aba bana bahabwe ubuvuzi bukwiye kandi bwihuse.

RDF kandi yavuze ko yihanganishije imiryango y’abo bana bakomeretse, yongeraho ko ibabajwe n’akaga batewe n’iyo mpanuka. Itangazo ryayo rigira riti: “Ingabo z’u Rwanda zifatanyije mu kababaro n’imiryango y’abana bakomeretse kandi ziri gutanga ubufasha bukenewe haba kuri bo ndetse no ku miryango yabo.”

Iyi ni yo nshuro ya mbere igisirikare cy’u Rwanda gitangaje ko drone yacyo ikoreye impanuka imbere mu gihugu.

Byibukwa ko mu kwezi kwa Nyakanga 2016, ari bwo hatangiye gahunda yo guhugura inzego z’umutekano ku bijyanye no gukoresha indege zitagira abapilote mu bikorwa bitandukanye, birimo imyitozo ya gisirikare, kugenzura umutekano, n’indi mirimo.