Abarwanyi ba FDLR batahutse mu Rwanda bafashijwe na MONUSCO

Ingabo z’Umuryango w’Abibumbye zishinzwe kugarura amahoro muri Repubulika ya Demokarasi ya Congo (MONUSCO) zatangaje ko ku wa mbere zacyuye mu Rwanda abarwanyi barindwi bahoze muri FDLR n’imiryango yabo igizwe n’abantu 42, bose biyemeje gutaha ku bushake bwabo.

Nk’uko bitangazwa na Radio Okapi, ifashwa n’Umuryango w’Abibumbye, abo barwanyi biyambaje MONUSCO nyuma yo kumva ubutumwa bwo gushyira intwaro hasi no gusubira mu gihugu cyabo mu mahoro, ubutumwa bumaze iminsi butambutswa hirya no hino muri Kivu ya Ruguru.

Kuva muri Mutarama 2025, Ishami rya ONU ryita ku mpunzi (UNHCR) ku bufatanye n’abategetsi b’umutwe wa AFC/M23, ugenzura bimwe mu bice bya Kivu ya Ruguru na Kivu y’Epfo, bamaze gufasha gutahuka abarenga 5,000 b’Abanyarwanda bari barahunze kuva mu myaka yashize.

Abasesenguzi bavuga ko nubwo urugendo rwo gucyura abarwanyi n’impunzi rutaragera ku ntego, icyizere cy’amahoro mu karere kirimo kugaruka gahoro gahoro. ONU ivuga ko izakomeza gufatanya n’ibihugu byombi mu gushakira umuti urambye ikibazo cy’imitwe yitwaza intwaro n’impunzi z’Abanyarwanda zikiri muri Congo.